Тыдзень традыцыйнай культуры распачаў Ашмянскі раённы цэнтр культуры ўрачыстым адкрыццём, у якім прынялі ўдзел майстры і ўмельцы аддзела рамёстваў і традыцыйнай культуры, фальклорна-інструментальны ансамбль аграгарадка Граўжышкі, бібліятэкары.
Тэматычны культурны дзень для жыхароў горада і гасцей быў насычаны і цікавы. На выставе работ майстроў і ўмельцаў Ашмяншчыны — вырабы для душы. Прысутныя мелі магчымасць на майстар-класах пазнаёміцца з ткацтвам паясоў на дошчачках, саломапляценнем, стварэннем “Лялькі-мотанкі”, валяннем з воўны, лепкай з гліны.
Музычныя творы, у тым ліку і старадаўняй музыкі,разам з традыцыйнымі беларускімі гульнямі натхнялі і выканаўцаў, і ўдзельнікаў мерапрыемства на добры настрой і станоўчыя эмоцыі. Бібліятэкары запрасілі ўдзельнікаў ў біблія-кафэ, прысвечанае традыцыйнай культуры Беларусі.
Эстафету народнай творчасці падхапіў аддзел культуры і вольнага часу аграгарадка Кракоўка. У аўторак віталі гасцей і наведвальнікаў Дома культуры народны ансамбль народнай песні “Жытніца” і мясцовая бібліятэка. У этнагасцёўні “З народнымі традыцыямі ў новы век” — бібліятэчная выстава, вышыванкі і вырабы мясцовых умельцаў. Пазнавальнай і змястоўнай атрымалася рэканструкцыя элемента вясельнага абраду “Дарэнне”, а канцэртная праграма ансамбля “Жытніца”, пабудаваная на выкананні вясельных песень, дапоўніла каларыт народнага абрада.
У фальклорным квэсце “Камень лёсу” на тэрыторыі валуна “Нявесцін камень” у сераду прынялі ўдзел не толькі жыхары аграгарадка Навасёлкі, але і гараджане, жыхары навакольных вёсак. Камень-цудатворца вабіць сваёй таямнічасцю і загадкавасцю. На аснове мясцовых легендаў і паданняў была пабудавана анімацыйная пастаноўка. Наведвальнікаў праграмы закружылі майстар-класы па народных танцах. Жарты, гульні, спевы не змаўкалі на працягу некалькіх гадзін. Арганізатары мерапрыемства запрасілі на дэгустацыю верасковага мёду з травяной гарбатай.
Як падкрэслілі арганізатары, кожны культурны тэматычны дзень стане адметным. У чацвер запланаваны фальклорныя сустрэчы і майстар-классы ў вёсцы Гродзі, ў пятніцу на дзень адкрытых дзвярэй і батлейку запрашае аддзел рамёстваў і традыцыйнай культуры горада Ашмяны, а краязнаўчы музей імя Ф. Багушэвіча чакае наведвальнікаў на выставе “Быт і рамёствы нышых продкаў”. У суботу запрашае “Гальшанскі замак”. На пляцоўцы побытавых танцаў “Млын” чакаюць аматараў беларускіх народных танцаў. Завершыцца тыдзень традыцыйнай культуры ў нядзелю ў Гродзях народна-абрадавым святам “Сёмуха” і канцэртнай праграмай творчых калектываў раёна.
Ганна ДАВІДОВІЧ.
Фота Марты БАГДАНОВІЧ.